Iċ-Ċentru tat-Traduzzjoni għall-Korpi tal-Unjoni Ewropea huwa aġenzija tal-Unjoni Ewropea. Stabbilit fil-Lussemburgu fl-1994, il-missjoni ewlenija tiegħu hija li jipprovdi servizzi ta’ traduzzjoni u dawk lingwistiċi lill-aġenziji deċentralizzati l-oħra tal-UE. Kultant jassisti wkoll lill-istituzzjonijiet u l-korpi tal-UE li għandhom is-servizzi ta’ traduzzjoni tagħhom stess matul perjodi ta’ volumi kbar ta’ xogħol jew għal proġetti speċifiċi. Bħalissa għandu madwar 200 membru tal-persunal, inklużi uffiċjali, aġenti temporanji u persunal kuntrattwali.

Sa mill-bidu tiegħu kiber b’mod kostanti, id f’id ma’ numru dejjem jikber ta’ lingwi uffiċjali tal-UE u ta’ klijenti ferm speċjalizzati. Iċ-Ċentru kiseb esperjenza konsiderevoli fl-issodisfar tal-ħtiġijiet speċifiċi tal-klijenti tiegħu, kemm jekk dawn ikunu relatati mat-tip ta’ servizz, il-format tal-fajl, l-iskadenza, il-qasam ta’ kompetenza jew firxa wiesgħa ta’ kombinazzjonijiet lingwistiċi.

Illum, iċ-Ċentru jipprovdi firxa wiesgħa ta’ servizzi lingwistiċi, u jissodisfa l-ħtiġijiet diversi tas-sħab numerużi tiegħu. Ara l-lista sħiħa tas-sħab tagħna

It-tieni missjoni taċ-Ċentru hija li jipparteċipa fil-kooperazzjoni interistituzzjonali fil-livell tal-UE bil-ħsieb li jiġu razzjonalizzati l-metodi ta’ ħidma u jinkisbu ekonomiji ta’ skala. Pereżempju, sa mill-2003, iċ-Ċentru tat-Traduzzjoni żviluppa u ġġestixxa wkoll il-bażi tad-data terminoloġika interistituzzjonali IATE f’isem is-sħab istituzzjonali tiegħu.